Mugaz gaindiko elkarlan-politika sustatzea

Kontseilu Orokorrak mugaz gaindiko xedea duten tokiko proiektuak sortzeko eta elkarlanerako dinamika bultzatu nahi du, arlo hauetan: kulturan, kirolean, laborantzan, gizarteratzean, ingurumenean, ekonomian… Horretarako, hausnarketa tematikorako bilkurak animatzen ditu eta lankideen bilaketan parte hartzen du. Proiektuak gauzatzen hasten direlarik, teknikoki eta diruz laguntzen ditu.

Gipuzkoa/Kontseilu Orokorra
Elkarlan-hitzarmena izenpetuz, hauek lortu dira:
.kirolari, elbarritasunari eta bertze hainbat gairi buruzko lantaldeak sortzea
.mugaz gaindiko kirolari buruzko Liburu Zuria idaztea
.elbarritasuna eta enplegu babestua kontuan hartzeko moduei buruzko mintegiak antolatzea
.gazteentzako hizkuntza-egonaldiak antolatzea
.Pirinio Atlantikoetan bizi diren hegoaldeko gurasoentzat eta Gipuzkoan bizi diren Pirinio Atlantikoetako gurasoentzat lehen haurtzaroari buruzko gida idaztea.

Nafarroa/Kontseilu Orokorra
Bi administrazioek esparru-akordioa izenpetuko dute, kirolaren, kolegioko ikasleen arteko trukeen, energia berriztagarrien, laborantzako elikagaien eta bertze hainbat arloren mugaz gaindiko harremanak garatzeko.

Aragoi/Kontseilu Orokorra
Bi administrazioek Mugaz gaindiko Europako Lankidetzarako Taldea (GECT) sortzeko proiektua dute. Egitura horrek hainbat funtzio ukanen ditu; horien artean, Pourtaleteko ibilbidea kudeatzea, mantentzea eta ustiatzea.

Eskualde-politikaren baitan, Europar Batasunak mugaz gaindiko lankidetza bultzatzen du, Feder-ak (Eskualdeko Garapenerako Europako Funtsak) babestutako programen bitartez.  
Pirinio Atlantikoetako Kontseilu Orokorrak programa horiek animatzen ditu, Pirinioetako Katearen mendebaldean.

POCTEFA - Espainia-Frantzia-Andorra lurralde-lankidetzarako programa - 2007-2013:
POCTEFAk (lehen Interreg zenak) 2013 arte iraunen du. Programaren baldintzak bete behar dituzten proiektu-buruei zuzendua zaie; baldintzen artean, hauek bete behar dituzte:
- Programari dagokion lurraldean izatea;
- Zehaztutako 3 ardatz hauetan sartzen den gaia duen proiektua aurkeztea:
1. ardatza: mugaz gaindiko integrazioa indartzea, aktibitate ekonomikoen, berrikuntzaren eta giza kapitalaren arloetako osagarritasunak baloratuz, mugaz gaindiko lankidetzarako logikaren arabera.
2. ardatza: lurraldeak eta natur eta kultur ondarea baloratzea, xede iraunkorrarekin. Ingurumen-baliabideak babestea eta kudeatzea.
3. ardatza: biztanleen bizi-kalitatea hobetzea, lurralde-egituratze eta garapen iraunkor estrategia komunen bidez.
- Mugaz gaindiko balio erantsi baieztatua duten ekintzak garatzea;
- etab.

 

Euro-eskualdeko konferentzia (Pirinioetako mendebaldea)
 
Lau finantza-erakunde hauek biltzen dituen egitura da: Eusko Jaurlaritza, Gipuzkoako Foru Aldundia, Akitaniako Eskualdeko Kontseilua, Pirinio Atlantikoetako Kontseilu Orokorra –eta, horren baitan, Pirinio Atlantikoetako Prefektura eta Euskal Herriko Hautetsien Kontseilua-. Baionako Kontseilu Orokorreko ordezkaritzan unitate teknikoa sortu da, mugaz gaindiko biztanleek dituzten eguneroko arazoei aterabide praktiko eta konkretuak atzemateko eta bideratzeko. Konferentziak 4 lehentasun nagusi ditu:
1- Euro-eskualdeko biztanleen eta eragile ekonomikoen mugikortasuna eta trukeak erraztea,
2- ingurumena eta bizi-kalitatea babestea,
3- aberastasun-sorrera bultzatzea, formakuntza, teknologien tokialdaketa eta estrategia ekonomikoen arloetan lankidetzak sortuz,
4- mugaz gaindiko zerbitzu publikoa hobetzea.

Adibide gisa, Konferentziak mugaren bi aldeetako larrialdiko medikuntza-laguntza hobetzeko lan egiten du, dagokion lurraldeak ukan ez dituen deiak birbideratzeko. Drogen kontrako prebentziorako eta borrokarako plan komuna sortzeko etab. ere aritzen da.