Har vàler ua politica de cooperacion transfrontalèra

En ajudar au montatge de projèctes locaus transfrontalèrs

Lo Conselh generau que vòu hargar un vam de cooperacion e de creacion de projèctes locaus transfrontalèrs arron la cultura, los espòrts, l'agricultura, l'insercion, l’environament, l’economia… Entad aquò, qu'anima amassadas de reflexion tematicas e que s’implica dens la recèrca de partenaris. Quan los projèctes entran en la fasa operacionau, que'us acompanha autanplan au nivèu tecnic com financèr.

En desvolopar la cooperacion enter las institucions

Gipuzkoa/ Conselh generau
La signatura d’ua convencion de cooperacion que permetó :
.la mesa en plaça de grops de tribalh arron l'espòrt, lo handicap…
.la redaccion d’un Libe blanc arron l'espòrt transfrontalèr
.la tienguda de seminaris arron las presas en carga deu handicap e de l’emplec emparat
.l’organizacion de sejorns lingüistics entaus joens
.la redaccion d’un guida arron la petita enfança de cap tà parents espanhòus qui viven en França e parents francés qui viven en Gipuzkoa.

Navarra/Conselh generau
Las duas collectivitats que van signar un acòrd-quadre entau desvolopament de las relacions transfrontalèras arron deus tèmas de l'espòrt, deus escambis enter collegians, de las energias renoveladeras, de l’agro-alimentari…

Aragon/ Conselh generau
Las duas collectivitats que tribalhan tà apitar un Gropament Europenc de Cooperacion Transfrontalèra (GECT) qui aurà mantuas foncions dont la gestion, l’entertien e l’espleitacion de l’itinerari deu Portalet.

En participar aus programas europencs de finançament de projèctes transfrontalèrs
 

Dens l'encastre de la soa politica regionau, l’Union Europenca que hè vàler la cooperacion transfrontalèra mercés a programas neurits peu Feder (Fons Europenc de Desvolopament Regionau).  
Lo Conselh generau deus Pirenèus Atlantics qu'anima aqueths programas capvath la zòna Oèst de la Cadena deus Pirenèus.

POCTEFA - Programa de Cooperacion Territoriau Espanha-França-Andòrra - 2007-2013 :
POCTEFA (quauque còp Interreg) que's debanarà dinc en 2013. Qu'ei tà portaires de projèctes qui an de respóner a las exigéncias deu programa, e sustot :
- Estar situats suu territòri deu programa ;
- Presentar un projècte dab la tematica qui s’inscrívia dens l’un deus 3 axes definits :
Axe 1 : ahortir l’integracion transfrontalèra en har vàler las complementaritats tà çò de las activitats economicas, de l’innovacion e deu cabau uman, en ua logica de cooperacion transfrontalèra.
Axe 2 : har vàler los territòris, lo patrimòni naturau e culturau en ua logica duradera. Emparar e gerir las ressorças environamentaus.
Axe 3 : amelhorar la qualitat de vita de las populacions mercés a estrategias comunas d'estructuracion territoriau e de desvolopament durader.
- Desvolopar accions qui presenten ua meivaluda transfrontalèra vertadèra ;
- etc.

Conferéncia Euro-regionau (Oèst Pirenèus) 
 
Qu'ei ua instància qui amassa quate organismes finançaires : lo Govèrn basco, la Diputacion Forau de Gipuzkoa, lo Conselh regionau d’Aquitània, lo Conselh generau deus Pirenèus Atlantics, a la quau e participan tanben la Prefectura deus Pirenèus Atlantics e lo Conselh deus elejuts bascos. Ua cellula tecnica seduda a la delegacion deu Conselh generau a Baiona qu'estó creada entà har vàder e miar solucions practicas e concrètas aus problèmas de tot dia qui's pausan taus poblants transfrontalèrs. La Conferéncia que s’ei fixada 4 prioritats granas :
1- ajudar la mobilitat e los escambis entaus poblants de l’Euro-region e los actors economics,
2- preservar l’environament e la qualitat de vita,
3- favorizar la creacion de riquessas per cooperacions en matèria de formacion, de transferiment de tecnologias, d'estrategias economicas,
4- amelhorar lo servici public transfrontalèr.

Per exemple, La Conferéncia que tribalha entà amelhorar l'assiténcia medicau d'urgéncia deçà e delà de la termièra dab l'objectiu de tornar orientar los aperets qui ne son pas arrecebuts peu territòri de qui cau. Mes tanben dab la mesa en plaça d’un plan comun de prevencion e de luta contra las drògas, etc.